2025-02-11
2/10早上10:30海上實況-曼波魚
若無三兩三，欲按怎佇一逝超過三點鐘的海上航班，
全程用台語來導覽？！
誠心共廖鴻基老師呵咾一下，肯共咱鬥相共開台語航班
咱台灣四面環海，海洋生活一直攏是咱文化的一部份
台語嘛有真濟和海有關的詞彙，
佇討海人的日常對話內，遮的詞嘛一直流傳落來。
尤其是魚仔的名，代代討海人攏有咧用台語來稱呼。
這毋是干焦名詞的傳承，抑是生活經驗的記錄
海的性情、魚的習性、討海的智慧，攏藏佇遮的話內底。
討海人習慣用外型來介紹魚類
進前捌請老船長來教咱，花蓮海面頂常在看著的海豬、海翁仔，
伊的名台語是欲按怎講？
這馬嘛來試看覓，曼波魚佇討海人的喙裡，敢有另外一个名？
昨日頂晡的航班，咱閣遇著這條曼波魚，
一時好奇，曼波魚台語是按怎叫咧？
䖳魚！（發音像「鐵魚」）
船長笑笑講：「因為伊愛食水母啊！」
「喔，我咧想伊是無好食，像鐵鉼」
「無啦！因為水母台語叫『䖳』，『䖳』的發音（ㄊㄟ）聽起來像『鐵』。」
毋過，也有人叫「魚過」。
因為曼波魚的形體像一節一節的（像是斷一半），
所以有人閣稱伊「橛kueh8」。
「橛」的台語發音（ㄍㄨㄟ）聽起來像「過」。
這種以外型來號名的方式，正是台語的一大特色，
直接、實在，
討海人一看就知影，魚的形影、習性，攏已經藏佇名內。
台語毋但是咱日常咧講的語言，抑是咱的文化記憶。
古早人用台語來記錄生活，今仔日咱嘛有責任，
共遮的討海人的智慧留落來，
毋通予好聽的名消失去。
魚仔的名、風湧的形、船駛的方式，
攏藏佇台語的詞語內。
這不止是語言的問題，嘛是文化的問題
咱若無繼續講，這啲話就會愈來愈少人知，
閣過一擺，
可能就無人知影曼波魚閣有另一種叫法。
咱敢毋是應該愛來做一本海裡魚仔的台語繪本咧？！
記錄咱大海的故事，猶原嘛是記錄咱台灣話的未來。
影片連結 https://www.facebook.com/turumoan/videos/2110225196160648